اسلام آباد نائب وزیراعظم و وزیر خارجہ سینیٹر محمد اسحاق ڈار کی زیر صدارت سرمایہ کاری کے فروغ کے لیے تشکیل دی گئی کمیٹی برائے ترقی و سرمایہ کاری پورٹ فولیو کا اجلاس ہوا۔ اجلاس کا مقصد ملک میں سرمایہ کاری کے امکانات کا جائزہ لینا اور ترجیحی شعبہ جات کی نشاندہی کرنا تھا۔
اجلاس میں وفاقی وزرائے توانائی، اقتصادی امور اور پیٹرولیم، وزیراعظم کے معاون خصوصی طارق باجوہ، چیئرمین ایس ای سی پی، پاور، پیٹرولیم، خزانہ، سرمایہ کاری بورڈ کے سیکریٹریز اور متعلقہ وزارتوں، ڈویژنز و اداروں کے سینئر نمائندگان نے شرکت کی۔
اجلاس کے دوران مختلف سرمایہ کاری تجاویز کا تفصیل سے جائزہ لیا گیا اور مستقبل کے لیے ترجیحی شعبہ جات کی نشاندہی کی گئی۔ اس موقع پر نائب وزیراعظم نے ہدایت کی کہ متعلقہ وزارتیں اور ادارے باہمی روابط میں اضافہ کریں اور اپنی کوششوں کو مؤثر انداز میں ہم آہنگ کریں تاکہ سرمایہ کاری منصوبوں کو جلد از جلد حتمی شکل دی جا سکے۔
سینیٹر اسحاق ڈار نے زور دیا کہ پاکستان میں سرمایہ کاری کے فروغ کے لیے تمام ادارے سنجیدگی سے کردار ادا کریں اور سرمایہ کاروں کو ایک مربوط، سہل اور پرکشش ماحول فراہم کیا جائے۔
